ఈపీఎఫ్ చందాదారులకు డబుల్ గుడ్ న్యూస్.. భారీగా పెరగనున్న పెన్షన్.. ఏటీఎం నుంచి డబ్బులు విత్ డ్రా!

ఎంప్లాయీస్ ప్రావిడెంట్ ఫండ్ (ఈపీఎఫ్) చందాదారులకు త్వరలో కీలకమైన శుభవార్తలు అందనున్నాయి. ఉద్యోగుల కనీస పెన్షన్‌ను భారీగా పెంచడంతో పాటు ఏటీఎంల ద్వారా పీఎఫ్ డబ్బును విత్‌డ్రా చేసుకునే వెసులుబాటు కల్పించడంపై ప్రభుత్వం, ఈపీఎఫ్ఓ దృష్టి సారించాయి. ఈ మార్పులు అమలైతే కోట్లాది మంది ఉద్యోగులు, కార్మికులకు ఎంతో ప్రయోజనం చేకూరనుంది.

రూ.7,500కు కనీస పెన్షన్ పెంపు యోచన
ప్రస్తుతం ఉద్యోగుల పింఛను పథకం (ఈపీఎస్-95) కింద ఇస్తున్న కనీస పెన్షన్ రూ.1,000గా ఉంది. దీనిని ఏకంగా రూ.7,500కు పెంచాలనే డిమాండ్ చాలాకాలంగా ఉంది. కార్మిక సంఘాల నుంచి వస్తున్న ఒత్తిడి, పార్లమెంటరీ కమిటీ సిఫార్సుల నేపథ్యంలో కేంద్ర ప్రభుత్వం ఈ ప్రతిపాదనను తీవ్రంగా పరిశీలిస్తున్నట్లు సమాచారం. దీనిపై త్వరలోనే తుది నిర్ణయం వెలువడే అవకాశం ఉంది. ఇదే సమయంలో చందాదారుల ఖాతాలకు 8.25 శాతం వడ్డీ రేటును జమ చేసే ప్రతిపాదన ఆర్థిక మంత్రిత్వ శాఖ ఆమోదం కోసం ఎదురుచూస్తోంది.

ఏటీఎం విత్ డ్రాయల్స్.. రికార్డు స్థాయిలో క్లెయిమ్స్ సెటిల్‌మెంట్
చందాదారులకు మరింత ఊరటనిచ్చేలా, ఏటీఎంల ద్వారా నేరుగా పీఎఫ్ డబ్బును విత్‌డ్రా చేసుకునే సౌకర్యంపై ఈపీఎఫ్ఓ కసరత్తు చేస్తోంది. ఇది అమలైతే, అత్యవసర సమయాల్లో డబ్బు డ్రా చేసుకోవడం మరింత సులభం, వేగవంతం కానుంది.

మరోవైపు క్లెయిమ్స్ పరిష్కారంలో ఈపీఎఫ్ఓ సరికొత్త రికార్డులను నమోదు చేస్తోంది. 2025-26 ఆర్థిక సంవత్సరంలో రికార్డు స్థాయిలో 8.31 కోట్ల క్లెయిమ్స్‌ను పరిష్కరించింది. అంతకుముందు ఏడాది ఈ సంఖ్య 6.01 కోట్లుగా ఉంది. ఇందులో 5.51 కోట్లు అడ్వాన్స్ లేదా పాక్షిక విత్ డ్రాయల్ క్లెయిమ్స్ కావడం గమనార్హం. ఆటోమేషన్, డిజిటల్ ప్రక్రియల ద్వారా క్లెయిమ్స్ పరిష్కార వేగాన్ని ఈపీఎఫ్ఓ గణనీయంగా మెరుగుపరిచింది. సుమారు 71.11 శాతం అడ్వాన్స్ క్లెయిమ్స్‌ను కేవలం మూడు రోజుల్లోనే పరిష్కరించింది.

'ఈ-ప్రాప్తి' పోర్టల్‌తో కొత్త సౌకర్యం
ఇటీవల ఈపీఎఫ్ఓ 'ఈ-ప్రాప్తి' (E-PRAAPTI) అనే కొత్త పోర్టల్‌ను కూడా ప్రారంభించింది. దీని ద్వారా చందాదారులు తమ పాత, యాక్టివ్‌గా లేని పీఎఫ్ ఖాతాలను ఆధార్ ఆధారిత యాక్సెస్‌తో సులభంగా యాక్టివేట్ చేసుకోవచ్చు. యూఏఎన్‌తో లింక్ కాని పాత ఖాతాలు ఉన్నవారికి ఈ పోర్టల్ ఎంతో ఉపయోగపడుతుంది. ఈ డిజిటల్ మార్పులతో ఈపీఎఫ్ఓ సేవలు మరింత వేగంగా, పారదర్శకంగా మారుతున్నాయి.